2 ka atleta nga apil sa olympics gihatagan og cash incentive
CEBU, Philippines — Gihatagan og P400,000 nga cash incentives sa dakbayan sa Sugbo ang duha ka Cebuano athletes nga nisalmot sa Paris Olympics samtang misaad si acting Cebu City Mayor Raymond Alvin Garcia nga mohatag og P1 million kun ugaling makalangkat kini og medalya.
Atol sa flag raising kagahapon, si Garcia mihatag og tag P200,000 cash incentives sa matag usa sa Sugbuanon nga atleta nga sila si Elreen Ando ug John Febuar Ceniza, nga ni-compete sa weightlifting category sa Paris Olympics 2024.
Ang duha ka mga weightlifters gikan sa Barangay Carreta si Ando, samtang si Ceniza gikan sa Barangay pasil.
Ang midawat sa maong kantidad mao ang ilang mga pamilya nga nitambong sa flag-raising.
Si Garcia misaad nga mohatag og P1 million para sa gold, P500,000 sa silver, ug P300,000 sa bronze ug gikan kini sa iyang kaugalingon nga bulsa.
kini wa pay labot sa nalatid sa ordinansa nga gipangamahan ni Councilor Jerry Guardo nga nagtinguha sa paghatag og P1 million cash incentive ngadto sa Cebuano athletes nga makadala og gold medal.
Si Garcia nitug-an nga ang kagamhanan sa siyudad hugot gayud ang suporta sa paugnat sa kusog sa kabataan ug siya malaumon nga modoble ang iduso nga budget gikan sa sports commission para sunod nga tuig. (BANAT NEWS)
- Latest
