Transwoman biktima sa diskriminasyon?

CEBU, Philippines — Nag-viral sa social media ang usa ka video sa usa ka transwoman nunot sa iyang paminaw, diskriminasyong nadawat gikan sa usa ka policewoman ug babayeng gwardiya diha sa Basilica Minore del Sto. Niño sa Cebu City.

Si Athena Marithe Daphne Xochilt sa iyang video, makita ang ilang panaglalis diha sa ganghaan sa basilica.

Sa video makita nga gilalisan ang kabahin sa valid ID ug sa passport hangtud naabot sa isyu sa gender o pagkalalaki o pagkababaye nga nakabutang sa iyang pasaporte.

Madungog nga siya miangkong wala siyay ID apan duna siya’y passport apan madungog sab ang policewoman nga mitubag nga “gibawal” ang pagbilin og passport.  Wala sab maklaro sa video kun unsay rason nganong bawal ang passport ibilin hulip sa valid ID.  Miabot sa punto nga ang policewoman nangutana og ‘personal nga pangutana’ kun unsay nakabutang sa passport ni Athena bahin sa ‘gender’ niini.

Napugos si Athena sa pagtubag sa pag-ingon nga “male.” Maklaro sa iyang tingog nga nainsulto kini sa gibuhat sa maong polis. “Why are you’re talking about gender? Male, passport,” tubag pa niya.

Ang polis mitubag, “aw lakaw diretso”diha na misambat si Athena nga magbase diay sa “gender.”

 Ang babayeng gwardiya nadungog sab nga misambat nga “nganong dakuon pa man na nga valid ID ra man ang gipangayo.”

Dinhi sa Pilipinas, adunay 24 ka gitawag og valid IDs (primary ug secondary) ug kining tanan giisyu sa gobiyerno ngadto sa mga tawong angayan maghupot niini, ug usa niini ang passport gikan sa Department of Foreign Affairs.

Matud pa ni Athena miingon nga siya deboto ug dugay na siyang wala makabalik sa nasud tungod sa iyang trabaho.

Tuyo sab niya sa pag-anhi ang pagpalit og imahen sa Balaang Bata kay iyang dalhon ini og balik niya sa Taiwan diin siya nagpuyo karon kay usa siya ka magtutudlo didto.

Apan tungod sa mga katuigang wala na siya nakabalik dinhi, wala na siya masayod bahin sa polisiya nga gidili diay ang shorts kun mosud sa basilica.

Apan namasin gihapon siya kay duna man siyay nakitang mga langyaw nga nag shorts diha sa basilica nga wala magtapis.

Giingong gipangitaan siya og ID nga kinahanglan niyang ibilin aron siya pahuwamon og tapis aron siya makasud.

Apan kay wala man siyay nadalang ID gawas sa passport gikan sa DFA, mao kini ang iyang gipakita.

Apan giingong dili kini dawaton sa maong babayeng polis samtang ang gwardiya miinsister nga ‘valid ID ‘ gyud ug dili passport ang ilang dawaton.

Sa kadugayan gitugotan ra gihapon si Athena nga makasulod.

Giklaro niya nga walay labot ang basilica sa nahitabo tungod kay wa may polisiyang “No ID, No Entry” nga gipatuman.

Si Athena, niawhag sa tanan katawhan nga dili hukman tanang mga nagbantay sa basilica kay nagtuo siyang dili tanang security guard ug mga polis ingon niadto og batasan. Subo lang nga siya’y natungnan ug diha kini nahitabo sa basilica.

Giklaro sab niyang dili niya ikasuko ug ikainsulto nga tawgon siyang “Sir” kay base sa iyang passport lalaki man gayud siya. Kini bisan pa og nagpa- transplant na siya.

Gipahibalo sab ni Athena nga giimbitar siya sa city council ug gipaabot niya nga makaatubang sab ang mga nalambigit sa video ug kadagkuan sa simbahan.

Gisubay sa Banat News/Dyrf1215 ang basilica apan wala na didto ang babayeng gwardya nga anaa sa video ug wa pa usab mopagawas og pamahayag ang kaparian bahin niini.

Tungod sa nahitabo, girelibohan sa pwesto ang maong policewoman tungod sa pagapil-apil niini sa trabaho sa gwardiya sumala pa ni Police Lieutenant Colonel Gerard Ace Pelare, tigpamaba ni Police Regional Office(PRO)-7 Director Brigadier General Anthony Aberin.

"On that situation we see that there was no need for the police officer to get involved. Especially that naa pa ‘toy mga gipangpangayo nga documents and we really feel that we need to conduct investigation, and while we are conducting investigation  we will be relieving that particular police personnel from her duty," sigon ni Pelare.

Sa mga ingon ani nga sitwasyon, ang angay buhaton sa PNP personnel mao ang maximum tolerance matud pang Pelare.

Siya nidugang nga angay masayod ang polis sa limitasyon sa iyahang trabaho kay dili siya gwardiya kondili us aka polis, apan sa iyang gibuhat nagsusama siya og guwardiya sa simbahan.

"The police(woman) in that instance is obviously overzealous in her work mao ng nagkagubot gamay. And it drew the attention of the public, again as I've mention the personnel concerned was administratively relieved from her duties pending the investigation, we are not saying that she is already guilty but we will conduct investigation and if you are going to look at the video there is an obvious reason to investigate," matod ni Pelare. (BANAT NEWS)