NLC nakahatag og positibong resulta sa mga tinun-an — VP Duterte

CEBU, Philippines — Gitambongan ni Vice President Sara Duterte ang usa ka appreciation program nga nagsaulog sa mga nahimo sa unang tuig sa pagpatuman sa National Learning Camp (NLC) sa San Fernando Central School, San Fernando, Cebu, kagahapon Hulyo 10, 2024.

Atol sa iyang pakigpulong, si Duterte nagkanayon nga sa miaging tuig nakab-ot sa NLC ang dakong kalampusan nga nakaabot sa 938,341 ka mga estudyante sa grade 7 ug 8, pinaagi sa intervention, consolidation ug enhancement camp sa 34,383 ka eskwelahan sa tibuok nasud.

Matud niya nga ang resulta sa assessments nagpakita nga ang hiniusang paningkamot sa tanan nakatabang sa pag-uswag sa performance sa mga estudyante sa math, science ug english.

Tungod niana gipasalamatan sa bise presidente ang 62,773 ka mga magtutudlo nga miboluntaryo alang sa grade 7 ug 8 ug sa 166,263 ka magtutudlo nga nalambigit sa uban pang kalihokan sa end-of-school year break.

Gipasalamatan usab niya ang mga nitabang sa pagsugod sa ikaduhang tuig sa pagpatuman niini, diin kining transformative program mas mapalapad kay dili lang grade 7-8 ang makapahimolos, kundi lakip na ang mga grade 1-3 ug grade 7-10.

Ang ikaduhang tuig sa programa pormal nga gibuksan niadtong Hulyo 1, 2024, adunay 2,183,327 ka mga estudyante sa grade 1-3 ug 7-10 ug 185,759 ka learning camp volunteers sa tibuok nasud.

Ang matag magtutudlo ug mga estudyante makadawat og teaching and learning materials sa reading, english, mathematics ug science. Dugang pa, adunay pundo nga gigahin para sa orientation ug inadlaw nga gasto sa pagkaon para sa deped ug non-deped volunteers.

Lakip usab ang mga naghatag og makalingaw nga mga kalihokan og serbisyo sama sa eye and dental check-ups sa mga pinili nga eskwelahan ug uban pa.

Malaumon si Duterte nga kining programa magpadayon nga maghatag og positibo nga mga sangputanan, pagpauswag sa pundasyon sa literasiya, numeracy ug mga kahanas sa ika-21 nga siglo nga hinungdanon sa umaabot nga kalampusan sa mga estudyante.

Apan matud niya, sa pagpadayon sa NLC kinahanglan ang suporta sa tibuok nga komunidad ug ang pagtinabangay, pag-inambitay alang sa kalampusan sa national learning camp para sa kabataan.

Busa mapasalamaton kini sa mga ginikanan, parent-teacher association, school governing councils, regional directors, superintendents, education supervisors, non-government organization ug uban pa nga kanunay niabag sa mga tinun-an ug mga tunghaan.

Lakip usab ang Union of Local Authorities of the Philippines (ULAP) nga nagpakita og suporta pinaagi sa board resolution aron pagdasig sa mga LGU nga mosuporta niining learning recovery program. (BANAT NEWS)