Nanarbaho sa BPO miabot na og 1.7 million
CEBU, Philippines — Miabot na sa 1.7 million ang mga nagtrabaho sa business process outsourcing BPO sa Pilipinas ug mikita kapin sa 35 billion dollars sa pagtapos sa 2023, sigon pa sa year-end report.
Apan ang maong kalambuan nagkinahanglan og dugang mga imprastraktura aron mapadayon ang pagsaka niini. Gitaho nga gikinahanglan ang padayon nga pag invest usab sa real estate, reliable internet, ug kasaligan nga baseload power supply sa mga lugar diin anaa ang mga BPO.
Kini nga mga rekisito gihan-ay aron makab-ot ang "Roadmap 2028 Vision" sa Information Technology and Business Process Association of the Philippines (IBPAP).
Matud ni IBPAP’s president Jack Madrid, nga ang ilang forecast "to reach two million jobs by 2025."
Ang maong "roadmap" report nag ingon usab nga importanteng dili lang sa Manila mag invest sa maong mga rekisito kung dili sa ubang lugar usab sa nasod sama sa mga syudad nga gitawag og Centers of Excellence, Next Wave Cities, ug Digital Cities kung diin gitan-aw ang pag uswag sa mga IT ug BPO susama sa Sugbo.
Sa tuig 2028, gikatakda nga moabot na sa 2.5 million ang mga empleyado sa IT-BPM sa Pilipinas ug mukita kapin 59 billion dollars. Katunga niini gitagna nga mag gikan sa mga lugar gawas sa Metro Manila.
Tungod kay anaa naman ang "hybrid working model" gihangop sa mga stakeholders nga adunay paglambo sa Internet connectivity nga barato sa mga residential areas gawas sa mga business district.
Gikinahanglan usab ang stable nga power supply nga maoy importante para dili ma pakgang ang operasyon sa IT-BPM bisag naa pa sila sa ilang balay nagtrabaho tungod sa hybrid working model.
Sa Sugbo, gisugdan na og pangandam ang paghimo og dugang nga mga in-island power plants para dili magkuwang og kuryente sa probinsya.
Mismong si Gov. Gwen Garcia kauban ang mga lider sa business sector ang nisuporta sa pagtukog og bagong mga power source sa probinsya. — MEL BANAT NEWS
- Latest
