Sinulog Grand Parade anha gihapon sa SRP — Rama

CEBU, Philippines — Pabilin ang baruganan ni Cebu City Mayor Michael Rama nga anha gihapon sa South Road Properties ipahigayon ang Sinulog Grand Parade sa tuig 2024.

Kini taliwala sa tinguha ni Cebu Governor Gwendolyn Garcia uban sa pipila ka mga mayor sa probinsya sa Sugbo nga anha lang himoon sa Cebu City Sports Center ang maong kalihukan.

Matud pa sa Mayor, walay kausaban og magpabilin ang Sinulog Grand Parade sa SRP ug giawhag ang mga Sugbuanon sa pagtabang ug pag-ampo alang sa kalampusan sa sunod tuig nga sinulog.

Gibutyag sa mayor nga preparado na sila ug niadto pa silang nilabay nga buwan sa Agosto nagsugod sa pagpangandam alang sa dakong kalihukan sa siyudad.

Dako usab ang pagsalig sa mayor sa Sinulog Festival’s Executive Committee nga gipangulohan ni Engr. Ricky Dakay.

Gipaneguro usab ni Rama nga ang kagamhanan sa siyudad subsub ang pagpangandam aron magmalamposon ang Sinulog sa sunod tuig.

Si Konsehal Jerry Guardo ang Chairman sa Infrastructure sa siyudad nibutyag nga nihimo na sila og ocular inspection sa SRP og Cebu City Sports Center diin ang resulta sa ilang rekomendasyon iduso nila ngadto ni Mayor Michael Rama.

Sumala pa ni Guardo, mag-agad ra gayud sila sa mayor kung unsa ang desisyon niini para sa umaabot nga kalihukan sa Sinulog Grand Parade.

Gitug-an ni Guardo, naana hinoon sa 70 porsyento ang pagpangandam karon sa SRP diin mas maayo ilang pagpangandam karon kun ikomparar sa nilabay nga tuig.

Dugang pa niya nga aduna usab silay mga nakita nga angayan buhaton sa CCSC kung mahimo man kini nga alternatibo usab nga dapit alang sa Sinulog ilabi na padayon ang trabaho niini alang sa pag host sa Palarong Pambansa ug gitan-aw usab nila ang seguridad sa katawhan. (BANAT NEWS)