Usa ka kilong shabu nasakmit  

CEBU, Philippines —  Usa ka high value individual sa kampanya kontra ilegal nga drugas ang nadakpan sa kapolisan sa Sitio Riverside sa Barangay Lorega-San Miguel sa Dakbayan sa Sugbu niadtong Biyernes sa gabii. Ang dinakpan mao si James Cueva Codilla alyas Niko, 32, residente sa Sitio  San Miguel sa naasoy nga barangay. Si Codilla nakuhaan og 1,050 gramos sa gituohang shabu nga mobalor og P7.1 million.

Nakadawat og impormasyon ang kapulisan sa illegal nga kalihukan sa suspetsado hinungdan gipaubos kini og duha ngadto sa tulo ka semana nga monitoring.

Nahibaw-an sa mga otoridad nga maka dispose ang suspetsado og dili momenus usa ka kilo nga shabu kada semana ug giingong ang nagsugo niya naa sulod sa Cebu City Jail Male Dormitory.

Sa pikas bahin, usa ka 23-anyos nga babayeng modalaw unta sa kabanay nga napriso sa Cebu City Jail ang gidakop sa mga jailguards human nasakpan ang usa ka paketeng gituohang shabu kauban sa iyaha untang dad-on nga mga pagkaon sa sud kagahapong adlawa.

Ang maong babaye nga taga Sitio Silangan 1 sa Barangay Tejero, Cebu City maghatud unta og pagkaon sa giduaw nga inmate, apan sa pagsusi sa jailguards sa iyang dalang eco-bag, nabantayan nga strap niini nga lahi og tahi.

Sa dihang gihikap nagbugdo kini maong gisusi dayon ug nasakpan nga gipaipit didto ang us aka paketeng shabu unya gibalik og tahi.

Sa pikas bahin, gipanglantawan sa Philippine Drug Enforcement Agency (PDEA)-7 nga mosaka ang demand sa illegal drugs karong nagkaduol na ang Pasko diin daghang kwarta ang mga tawo.

Ang tigpamaba sa PDEA-7 Leia Alcantara miingon nga hugot ang monitoring karon sa ilang teams dili lang sa Cebu Province apan apil na ang ubang Probinsiya sa Central Visayas.

Padayon ang ilang monitoring sa posibleng pag-abot ug pag-apod-apod sa mga illegal nga drugas dinhi sa rehiyon. Ang shabu maoy usa sa matud pa halinon kaayo karon kay barato itandi sa ubang drugas sama sa ecstasy.

“Naa tay mga reports pero on going validation gihapon, lisod kaayo ning ecstasy i-penetrate wala mi moingon wala mi ka penetrate naka penetrate ta pero difficult ka ang ilahang clientele dili ordinary nga ingon lang imong dagway, dapat ma assess nila, within their circle ilang ma distribute dili man pareha og shabu nga ordinary looking pwede naka makapalit, there is a challenge in monitoring ecstacy but we have networks,” sigon ni Alcantara.