Probinsiya nagtinguha nga mahatagan og pwesto sa TRC

CEBU, Philippines —  Gitinguha karon sa Probinsiya sa Sugbo nga mahatagan kini og pwesto o adunay representante nga gikan sa Kapitolyo ngadto sa Toll Regulatory Council (TRC) sa Cebu-Cordova Link Expressway (CCLEX).

Atol sa gipahigayong tigom uban sa kadagkoan sa Cebu-Cordova Link Expressway Corp. niadtong Hunyo 29, 2023,  si Gobernadora Gwendolyn Garcia nagkanayon nga angayan nga mahatagan og representante ang Probinsiya sa Sugbo sa TRC hilabina nga ang maong taytayan moagi sa Lungsod sa Cordova nga usa sa mga lungsod nga sakop sa Probinsiya sa Sugbo.

Si Allan Alfon, presidente ug general manager sa CCLEC nagkanayon ngadto sa gobernadora nga andam ang CCLEC mohatag og duha ka seat o pwesto alang sa representante sa Probinsiya sa Sugbo ngadto sa TRC.

Sa pagkakaron, ang TRC adunay lima ka miyembro, tag usa ang lokal nga kagamhanan sa Dakbayan sa Sugbo ug ang Lungsod sa Cordova ug tulo ang gi-appoint sa CCLEC.

“The province, in this particular composition, was left out, forgetting the fact that perhaps 80-85 percent of those that use the bridge are coming not just from the City of Cebu and Municipality of Cordova”, matud ni Garcia base sa taho sa Capitol Information Office.

Base sa joint venture agreement, ang Probinsiya sa Sugbo wala maapil sa governing board sa maong taytayan. Ang mga bokal nga sila si Carmela Franco, Glenn Soco ug Raul Bacaltos nga nitambong usab sa maong tigom nagkanayon nga mopalabang sila og provincial board resolution aron mahimong formal ang hangyo sa Kapitolyo. BDB (BANATNEWS)