Baes: Pagkugi, determinasyon ug  pag-ampo, yawe pagpasar sa Bar

CEBU, Philippines — Kakugi, determinasyon ug pag-ampo maoy gihimong pundasyon sa mga tinun-an sa University of San Carlos College of Law nga mipasar ug mi-top sa 2022 Bar Examination kansang resulta migawas niadtong Biyernes, Abril 15, 2023.

Nakuha ni Atty. Gabriel Gil Baes ang top 6 ,  samtang nakuha ni Atty. Angelika Vega ang 26th place ug Chrisha Ver Ramirez Romano-Weigel ang 27th place.

Si Baes miingon nga first year pa lang sa College of Law kinahanglan mangugi na gyud og basa, i-manage ang oras ug nakatabang sab ang suporta sa iyahang pamilya ingon man sa USC College of Law ug mga tawo nga misalig kaniya.

“There’s really no secret gyud, it’s just the diligence and hard work magpadaog gyud sa imoha, it’s not the genius because genius is really useless if wala’y hard work, in the end what matters is what you do,” sigon sa bag-ong naabogado.

Samtang si Vega sa iyang bahin miingon nga giampo niya ang tanan ngadto sa Labaw’ng Makagagahom ug andam nga dawaton ang kabubut-on sa Ginoo.

“Everything happens for a reason nga kung dili siya ihatag ni God karon maybe naa siya’y better plans for you and akoang take lang siguro sa future bar examinees is to always pray, to stick to your routine,” ni Vega pa.

Usa ka adlaw sa wala pa ang ianunsiyo ang mga mipasar sa Bar, gi deactivate tanan ni  Vega ang tanan niyang social media accounts. Dihang nakadawat siya sa text nga nagpahibalo siyang nakapasar siya sa Bar, misaka siya sa rooftop sa ilang balay aron klaruhon didto ang nakasuwat sa text.

Apan sa pagpadung pa niya sa taas , gitawgan na siya sa mga excited kaayo niyang mga higala nga nanghugyaw og siyagit nga siya nabutang sa  top 26.

Si Baes uban iyahang ginikanan nag-atang sa live feed sa announcement sa Supreme Court ug grabeng kulba matod pa ang ilang gibati. Naghudyaka silang tanan pagkakita nga top 6 kini sa bar exam.

Si Baes ug Vega parehong wala magdahom nga makasud sa topnotchers sa Bar.

Tiwason una ni Vega ang iyahang kontrata isip Legal Assistant sa DOH Treatment and Rehabilitation Center sa Lungsod sa Argao nga mahuman sa buwan sa Hunyo sa dili pa ang sunod nga plano niini.

Samtang si Atty. Baes nagplano nga mo-praktis gyud sa iyahang propesyon isip manlalaban.— IBM ( Banat News )