Bag-o nga buhatan sa FISECA sa Talisay tukoron
CEBU, Philippines — Bag-ong buhatan sa Fisheries Sea Ecological Care (FISECA) tukoron sa kagamhanan sa dakbayan sa Talisay human kini maguba nonot sa pag-igo sa bagyong Odette.
Kini ang gipahibawo ni Talisay City mayor Gerald Anthony “Samsam” Gullas.
Kaniadto ang buhatan sa FISECA nahimutang sa barangay Cansojong apan naguba kini gumikan sa dagkong bawod ingon man pag igo sa bagyong Odette.
Ang trabaho sa taga FISECA nagpadayon bisan paman og wa na silay opisina pero ilang gihimo diha lang una sa mga kabalayan nipahiluna o mopasilong.
Si Gullas nagkanayon nga andam na ang ilang plano nga himoan og bag-o nga buhatan ang FISECA ug kini anha ibutang sa sitio Salvador, Barangay Tanke.
Asoy pa niya nga iyang itapad ang buhatan sa FISECA ngadto sa Philippine Coastguard aron paspas ang ilang pagresponde kung pananglit adunay nga ilegalista sa kadagatan.
Dugang pa sa mayor nga gipaabot nalang nila ang papeles sa yuta nga makompleto aron masugdan na ang pagtrabaho. /MEL (BANAT NEWS)
- Latest