Sugod na ang Kwaresma

CEBU, Philippines — Magsugod na karong adlawa ang mga kalihukan sa kwaresma pinaagi sa ipahigayon nga Miyerkules sa Badlis sa mga nagkadaiyang simbahan sa Archdiocese of Cebu. Matud pa ni Fr. Jestoni Del Castillo, Principal sa Academia de San Martin sa Daanbantayan, nga karon adlawa atol sa pagsulod sa simbahan sa panahon sa kwaresma, nanghinaut siya nga mosalmot ang mga magtutuo sa kalihukan sa parokya. Sumala pa ni Del Castillo, maayo usab mamalandong ang magtutuo sa kahulogan sa mga rito, mga pagpenitensya ug mga simbolismo sa kwaresma, ilabi na sa pagdawat pagkuros sa abo sa agtang nga ang kahulogan mao ang paghinulsol ug atong kamatayon.

Paghinulsol nga sa ato pa mangayo kita og pasaylo sa mga sala ug biyaan ang karaan nga pagkinabuhi sa sala, busa higayon kini sa pagkumpisal ug pagpenitensya tungod kay sama sa panultihon sa kamatayon “Sa abog kita gikan ug sa abog kita usab pauli.”

Gibutyag ni Del Castillo, ang panahon sa kwaresma adunay mga sakripisyo sama  sa pagpuasa ug pag abstensiya.

Gitug-an ni Del Castillo, abstinensya sa matag biernes panahon sa kwaresma diin sa ato pa maglikay sa pagkaon ug karne, pinaagi sa pagdisiplina sa kaugalingon. (BANATNEWS)