Mga ginikanan sa gang members ipatawag

CEBU, Philippines — Ipatawag sa mga magtutudlo ug prinsipal sa Mabolo National High School ang ginikanan niadtong mga batang nalambigit sa gangs nga naay mga sakop diha sa maong tunghaan.

Kini maoy gibutyag ni Cebu City Police Office Deputy City Director for Operations Lt. Col. Wilbert Parilla dihang nahinabi sa mga tigbalita kagahapon.

Una niini, ang kapulisan ug ang mga magtutudlo sa Mabolo National Highschool nagtagbo human dunay estudyanteng gidunggab. Ang suspek u gang biktima miyembro sa managribal nga gang.

Matud ni Parilla nakahibalo na sila unsa nga mga gangs ug kinsa ilang mga miyembro mao nga gipatawag nila ang mga ginikanan aron sila pasidan-an ug ipalayo ilang mga anak gikan sa maong mga gangs. —IBM (BANATNEWS)