Dakung posisyon sa  PCL national chapter gitinguha ni Pesquera

CEBU, Philippines — Target karon sa bag-ong presidente sa Philippine Councilors League (PCL) Cebu City Chapter nga si Konsehal Jocelyn Pesquera nga magpapili siya alang sa dako nga posisyon sa national chapter sa maong liga.

Ang pilianan niya nga posisyon naa ra sa national vice chairperson, national Public Relations Officer (PRO), o ba kaha island vice president for Visayas.

Subay niini si Pesquera nakighinabi pa sa mga leader sa PCL sa ubang lugar aron masuta kun unsa ang posisyon nga mahimo niya nga daganan. Una na nga gibutyag ni Pesquera nga seguradoon gyud niya nga hatagan og patas nga oppurtunidad ang tanang sakop sa konseho ug dili siya maghuna-huna og partido.

Nagkanayon ang konsehal nga ang panaghiusa maoy tumong sa Liga.

Kahinumduman nga atol sa piniliay sa PCL, wala'y niatbang kang Pesquera.

Si PCL national general legal counsel Atty. Oliver Owen Garcia maoy nilingkod isip miyembro sa PCL Comelec kauban si Department of Interior and Local Government (DILG) Cebu City Director Dr. Neila Aquino.

Gikatakdang mag-umol ang PCL og ubay- ubay nga mga programa ug trainings alang sa mga konsehal subay sa tagsa-tagsa ka mga komitiba nga gihuptan niini. Nagkanayon ang konsehal nga importante kaayo ang trainings ilabi na sa mga bag-ong Konsehal. Una na nga nahimong sakop si Pesquera sa PCL niadtong 1998. —MEL (BANATNEWS)