VECO molusad sa”eBillTxt” alang sa mga konsumidor
CEBU, Philippines — Gikampanya karon sa Visayan Electric ang dugang inobasyon alang sa pag-alagad sa ilang mga konsumidor ug usa na niini mao ang paglusad sa ilang "eBillTxt".
Mao kini ang pamaagi kun diin madawat sa mga konsumidor ang bill nila sa kuryente pinaagi sa text message.
Nahaom kini sa mga tawo nga ganahan ma-direkta kanila ang bill ug dili na kinahanglan nga magpaabot sa mga mensahedor.
Suma pa sa tigpamaba sa Visayan Electric nga si Queenie Sanchez-Bronce nga usa sa nakanindot sa maong sistema kay ipaagi og text message ang link kun diin dinhi makita sa konsumidor ang PDF file sa bill.
Gitataw sa maong kompanya nga "password-protected" ang PDF bill busa dili ra angay mabalaka ang mga konsumidor.
Dugang pa niya nga kun daghan ang magpa-enroll, wala naa kaayoy papel nga magamit ug dako kini og matabang sa pagpreserbar sa kalikopan.
Sa mga konsumidor nga ganahan mopaubos sa maong pamaagi, bisitahon lang ang Facebook Page sa Visayan Electric kun diin nahimutang dinhi ang link sa pag-enroll niini.
Una nga gitataw sa maong kompaniya nga padayon ang pag-umol og mga sistema nga maghatag og kasayon o komportable nga sitwasyon sa ilang mga konsumidor. Gani nagmalampuson pud ang pamaagi nila nga mahimong bayaran ang bill sa nagkadaiyang bayad center ug sa pinili nga mga mobile application. —MEL (BANATNEWS)
- Latest
