Videoke gidili gihapon sa oras sa tingklase

CEBU, Philippines — Subli nga nipahimangno ang kapolisan ngadto sa katawhan kalabot sa paggamit sa karaoke machines panahon sa tingklase.

Matud ni Police Lieutenant Colonel Wilbert Parilla, deputy director for operations sa Cebu City Police Office nga ilahang balikan karon ang City Ordinance No. 1940 kun “The Anti-Noise Ordinance of Cebu City” nga giaprobahan niadtong Agosto 2002 ug giamendar kini kabahin sa oras sa paggamit sa karaoke machines ilabi na sa oras sa tingklase bisan anaa sila sa ilang mga balay.

Si Parilla nagkanayon nga ilahang gipahimangnoan ang publiko nga mosunod gyud sa maong ordinansa ilabi na nga nagsugod na pagbukas og balik ang klase diin adunay nagtungha pinaagi sa online ug module.

Ang maong ordinansa nagdili kini sa paggamit sa videoke sa alas 8:00 sa buntag ngadto sa alas 5:00 sa hapon.

Ug ilakip nila sa rekoreda ang pagpahibalo sa maong ordinansa aron malikayan nga adunay makamulta o mapasakaan og kaso.

Sa laing bahin, gipadayag sa opisyales sa Department of Education (DepEd) sa Dakbayan sa Mandaue nga hapsay ang unang adlaw nilang  pagbukas sa klase.                            

Si Edgar Espina, tigpamaba sa DepEd sa siyudad nagkanayon nga sa kasamtangan wala sila makadawat og taho gikan sa ilang mga tulunghaan nga nakasinati og mga kakulian tungod kay ang ilang mga magtudlo naghimo og higpit nga pagpangandam sa wala pa magbukas ang klase.        

Matud ni Espina nga gisugro nila ang advance printing diin mao kini ang ilang nasinati nga kakulian sa niaging tuig nga pagbukas  sa klase.       

Dugang ni Espina nga gihimo na nila ang imprinta sa ilang modules nga maoy gamiton sulod sa upat ka semana ug nagpadayon usab ang ilang pag-imprinta daan alang na usab sa mosunod pa nga semana. Romeo T. Limpangog/BDB (BANATNEWS)