350 ka sakyanan na-impound sulod sa 15 ka adlaw
CEBU, Philippines — Ubay-ubay sa mga motorsiklo ug ubang sakyanan ang na-impound sa Cebu City Transportation Office sulod sa tunga sa buwan sa Mayo tungod sa mga kalapasan.
Kini ang gitug-an ni John Paul Amores, public information officer sa Communications and Electronics sa CCTO nga nahinabi sa Banat News.
Matud ni Amores nga tunga sa buwan sa Mayo naka-impound sila og 305 ka motorsiklo, 19 ka 3-wheels, 11 ka traysikol, duha ka e-bike, ug 22 ka traysikad.
Sumala pa ni Amores nga ang mga na-impound tungod kay nakalapas sila pagmaneho nga walay lisensya ug rehistro sa sakyanan sukad niadtong nilabay nga tuig hangtud karon. Ang operasyon sa CCTO inubanan sa 11 ka police stations sa dakbayan.
Gihangyo sa CCTO ang mga tag-iya sa na-impound sa paglukat sa ilang mga sakyanan aron dili mamultahan sa matag adlaw sa storage fee.
Dugang pa ni Amores nga ang opisina sa CCTO abli Lunes hangtud Biyernes sa alas 8 sa buntag hangtud alas 5 sa hapon. /GMR (BANATNEWS)
- Latest
