MRII mang-apod-apod og libreng tubig
CEBU, Philippines — Ang Mactan Rock Industries Inc. (MRII) nga usa ka dakong supplier og tubig ang nangandam sa pagpang-apod-apod og tubig alang sa mga Sugboanon niining panahon sa nagpadayong hulga sa coronavirus disease 2019 pandemic ug ang pagsulod na usab sa El Niño.
Lakip sa ilang hatagan og libreng tubig kadtong mga dapit nga lisod ang ka kuhaan og tubig.
“We are giving water to those who have no access to water especially those living in depressed areas to help them battle the coronavirus disease or covid-19”, matud ni Antonio Tompar, chairman ug CEO sa MRII.
Sayo pa, ang Department of Health (DOH)-7 ang niawhag sa katawhan sa kanunay nga pagpanghugas sa mga kamot isip nag-unang pamaagi sa paglikay sa covid-19.
“The threats of the coronavirus have made it clear how important water is. That is why we are helping the government in this fight by offering our water”, padayag ni Tompar.
Nunot niini, ang MRII niawhag sa mga Sugboanon nga nagtinguha nga makaangkon sa libreng tubig sa pagdala og kaugalingong sudlanan og tubig ngadto sa ilang planta.
Ang mga planta sa MRII nahimutang sa Dakbayan sa Sugbo diha sa Perpetual Valley, Barangay Labangon; Sitio Greenfields, Barangay Banilad; Tabucanal, Pardo; Punta Princesa; M Lhuillier ug White Gold, Barangay Tejero.
Ang ubang planta sa MRII nahimutang diha sa Barangay Yati, Lungsod sa Liloan ug Vistamar Beach Resort ug ingon man sa Country Club, Suba Masulog, Suba Basbas, ug Coral Point sa Barangay Punta Engaño, Dakbayan sa Lapu-Lapu ug uban pa. /BDB (BANATNEWS)
- Latest
