Kapin sa 500 ka armas ang gisurender
CEBU, Philippines — Ang Police Regional Office (PRO)-7 higpit nga nipatuman sa ilang operasyon batok sa loose firearms sa tibuok Central Visayas.
Kini subay sa “Oplan Katok” diin panawagan kini sa mga naghupot og armas nga mokuha og lisensiya sa ilang mga armas ug molikay usab sa bisan unsang krimen o kasamok.
Base sa talaan sa PRO-7 nikabat ngadto sa 232 ka armas ang nasakmit atol sa gipahigayon nga mga operasyon sa kapolisan sukad sa paglingkod ni Police Brigadier General Valeriano De Leon isip direktor sa PRO-7 niadtong Oktubre hangtud sa nilabayng pasko.
Sa maong gidaghanon 35 niini ubos sa mga search warrant, 12 ang nasakmit atol sa mga checkpoint, walo ubos sa warrant of arrest, 68 atol sa buy bust operations ug 110 sa mga police response sa tibuok Central Visayas.
Nunot niini, nikabat ngadto sa 221 ka indibidwal ang nasikop nga nakuhaan og armas, siyam at large ug walo napatay atol sa operasyon sa kapolisan.
Subay usab sa Oplan Katok nikabat sa 594 ka armas ang gitahan ngadto sa kapolisan diin ang Cebu City Police Office (CCPO) adunay labing daghan nga nitahan og armas nga nikabat ngadto sa 259.
Kasagaran sa mga armas nga gitahan gikan kini sa mga individual nga residente sa bukirang lugar.
Lakip sa gitahan nga mga armas mga karaan na kini ug nagamit niadtong World War I ug World War II. /BDB (BANATNEWS)
- Latest
