CPPO alerto sa NPA anniversary

CEBU, Philippines – Gipaalerto sa Cebu Provincial Police Office ang tanang police stations subay sa anibersaryo sa New People’s Army sunod semana.

Kini ang gibutyag ni CPPO Director, Police Colonel Rhoderick Mariano, isip pagpangandam sa posiblidad nga adunay himuon nga kagubot ang NPA atol sa ilang anibersaryo.

Hinoon base sa intelligence monitoring sa kapolisan wala silay hulga sa kagubot nga na-monitor.

Apan usa nga ilang bantayan ang posibilidad nga pagpang-recruit sa mga batan-on aron moapil sa walhong grupo.

Bisan gideklarar na nga insurgency-free ang Probinsiya sa Sugbo apan dili gihapon mokompiyansa ang kapolisan hinungdan nga higpit ang pagpatrolya sa mga sakop sa Cebu Provincial Mobile Force Company (CPMFC) sa mga bukirang dapit ug pagpakiglambigit ngadto sa komunidad.

Pahugtan usab sa kapolisan ang intelligence monitoring sa kapolisan ilabi na sa mga lungsod nga nag-atubang sa Negros Oriental ug Negros Occidental nga notadong gipangtagoan sa mga sakop sa NPA. 

Samtang gisugdan na sa kapolisan sa Dakbayan sa Talisay ang pagpahinumdum sa mga tawo nga adunay armas nga dili pabuthon atol sa Pasko.

Si Police Major Gerard Ace Pelare, hepe sa Talisay City Police Station, nibutyag nga hinay-hinay na nila nga sugdan ang pagrekorida aron mahinumdum ang nanag-iya og armas nga sa ilang pagbaton og armas usa lang ka prebilihiyo nga gihatag sa gobiyerno ug angay nga dili abusohan.

Sigun pa ni Pelare nga mas modakop pa gyud sila sa mga tawo nga naghupot og armas nga walay dokumento.

Gani ang kapolisan sab mismo nga tigpatuman sa balaud ang lakip sa maong pahimangno.

Asoy pa ni Pelare nga sa pagkakaron nagpaabot sila kung unsay kamanduan sa ulohan nila nga buhatan kung kini taptapan ba ang sumbohan.

Gilikayan ang pagpabuto sa armas tungod kay delikado nga makaigo og tawo nga mao pa hinoon ang hinungdan sa kamatayon.

Nanghinaut si Pelare nga unta matinumanon ang Talisaynon aron saulogon ang Pasko nga malinawon. /GMR (BANAT NEWS)