Abogado nga nag-atubang og kasong cyber libel nakapyansa

CEBU, Philippines — Temporaryong nakagawas ang usa ka inilang abogado nga nagbase sa kaulohan human makapiyansa sa korte sa kasong 2 counts of Cyber Libel.

Nalutsan og warrant of arrest si Atty. Estrella Elamparo sa Regional Trial Court Branch 11 sa dakbayan sa Sugbo niadtong Nobiyembre 11, 2024.  Kini gumikan sa pasangil nga iyang giatubang kalabot sa giingong pagpangdaot niini ni Atty. Franciso Amit Jr kinsa abogado sa Sugbuanong negosyante nga si Kaiser Tan kinsa mikiha og large scale estafa sa kliyente niini nga si Michelle Lim Go Chu.

Ang pagpangdaot ni Elamparo kang Amit giingong nahitabo atol sa zoom press conference niadtong Marso 29 sa miaging tuig kalabot sa pagpadayag sa habig sa iyang kliyenteng si Chu sa kasong giatubang niini.

Sa maong press conference giingong mipasumbingay si Elamparo nga nakadawat ug death threat ang iyang kliyente human matod pa gipasakaan nila og kaso si Tan ug Amit og Cyber libel gumikan sa pagdaot usab niini sa iyang kliyente.

Mipasumbingay usab si Elamparo nga human usab ma deny ang motion ni Amit kalabot sa kaso sa iyang kliyenteng si Chu ang huwes nga nagdumala niini giingong didto na usab nakadawat og death threat.

Butang nga gihimug-atan sa korte nga walay kapasikaran ug pagdaot sa pagkatawo ni Amit hinungdan nga gipasaka ang kaso sa korte.

Sa pagkutlo ning maong balita padayon pa nga gipangita sa balaod si Chu human kini malutsi og warrant of arrest sa kasong large scale estafa nga gisang-at ni Tan batok kaniya.  — (BANAT NEWS)