Senior nanunggab sa maguwang kay gitutokan og tan-aw

CEBU, Philippines — Naangol ang usa ka 67-anyos nga senior citizen human kini unaya sa pagdunggab sa iyahang senior citizen usab nga manghud tungod kay giingong nasuko kini nga iyahang gitutokan og tan-aw niadtong Martes sa gabii diha sa 25C Gorordo Avenue, Sitio Dignos, Barangay Kamputhaw, Siyudad sa Sugbo.

Ang biktima mao si Bernardo Rullorta Griño samtang ang suspect mao si Eduardo Rullorta Griño, 60-anyos, ang duha parehong nagpuyo sa nahisgutang dapit.

Si Police Captain Mark Eric Papong, hepe sa Abellana Police Station sa Cebu City Police Office (CCPO) nagkanayon nga ang suspetsado nasuko kini dihang gitutokan og tan-aw sa maguwang hinungdna nga nagkaaway ang duha.

Atol sa ilang panag-away gidunggab sa suspetsado ang biktima gamit ang duha ka kitchen knives.

Ang biktima daling gidala ngadto sa tambalanan human sa hitabo ug nasikop usab dayon ang suspetsado sa mga polis.  Base sa imbestigasyon sa kapolisan giingong ang suspetsado mogamit kini og ilegal nga drugas ug gituohan sa mga polis nga niadtong higayona nga nahitabo ang insidente posibleng nakagamit og ilegal nga drugas ang suspetsado.

Ang suspetsado gikatakdang pasakaan og kasong frustrated homicide.  — (BANAT NEWS)