Mga vendor sa Cebu City gipangitaan og kabalhinan

CEBU, Philippines – Mga sidewalk vendor dunay posibilidad nga makabalik sa kanhi nila pwesto kong motuman sila sa regulasyon nga ipatuman sa kagamhanan sa Dakbayan sa Sugbo. Kini mao ang gipadayag ni Cebu City Mayor Edgardo Labella ngadto sa mga manindahay.

Matud ni Labella nga hinay-hinayon sa siyudad ang paghawan sa daplin sa kadalanan isip pagtuman sa kamandoan sa Department of Interior and Local Government.

Tumong niini nga maluag ang dagan sa trapiko diha sa kadalanan.

Ang hepe sa Prevention, Restoration, Order. Beutification, Enhancement (PROBE) Raquel Arce ug market administrator nagtagbo kini diin ilahang gihisgutan ang kabahin sa lugar nga mabalhinan sa mga mamaligyaay.

Samtang, si Cebu City Vice Mayor Michael Rama nagkanayon nga ang katungod sa mga namaligya diha sa sidewalk nga iyang gitawag og “sidewalk traders” kinahanglan nga balanse kini sa mga katungod sa ubang mga tawo.

Si Rama nagkanayon nga buot niyang motanyag og usa ka bag-ong site alang sa mga mamaligyaay.

Ang kagamhanan sa siyudad kinahanglang mohatag og tabang aron ang kahimtang ug panginabuhi sa mga manindahay mapalambo kini.

Samtang si Konsehal Alvin Dizon nagkanayon nga ang DILG memorandum circular ni-awhag sa mga Local Government Unit nga magpatuman og mga pamaagi alang sa pagsulbad sa mga isyu sa pagbalhin sa mga vendor aron malimpiyo ang mga dalan.

“Street vendors do not deserve our castigation. They deserve our recognition”, dugang ni Dizon. (/BDB)(BANAT NEWS)