Mga motorista naproblema sa bawod nga karsada

CEBU, Philippines — Mga motorista giingong taud-taud na nga nag-antos sa bundo-bundo nga aspalto sa karsada nga sumpay sa Natalio Bacalso Avenue gikan sa Lungsod sa Minglanilla paingon sa Dakbayan sa Talisay.

Giingong tungod sa bundo-bundo nga aspalto sa karsada nga susama og bawod ang maagian sa maong lugar adunay mga nadisgrasya nga motorista.

Si Engineer Lesley Anthony Molina, pangulo sa Department of Public Works and Highways (DPWH) 2nd engineering district niangkon sa maong suliran.

Gipadayag ni Molina nga nakabantay siya sa sitwasyon sa nahisgutang karsada ug aduna na sila’y plano sa kaugmaran niini.

Ug aduna na unta sila’y gigahin nga pundo niini apan naapil sa General Appropriation Act (GAA) nga gi-veto ni Presidente Rodrigo Duterte.

Matud ni Molina nga kon naaprobahan lang unta ang pundo naayo na unta nila maong karsada.

Si Molina nagkanayon nga dakong kantidad ang gikinahanglan sa pag-ayo sa karsada ug nanghinaot kini nga mahatagan unta og prayoridad ang maong problema.  Gikatahong ang nahisgutang nagbundo-bundo nga karsada ang hinungdan sa kasagarang disgrasya sa kadalanan sa habig sa Lungsod sa Minglanilla.

Samtang sa Dakbayan sa Talisay adunay nakalas nga motorista human nga wala makakontrolar sa manobela sa iyang gisakyan dihang nagbiyahe kini subay sa nagbawod-bawod nga karsada. (/BDB)(BANATNEWS)