Pagpamusil sa tigbakay usa ang patay, usa angol
CEBU, Philippines — Usa ka lalaki gipusil patay ug usa ang naangol sud sa tikbakayan atol sa kapistahan sa Sitio Sandayong, Barangay Cuanos sa Lungsod sa Minglanilla niadtong Sabado sa hapon.
Giila ang namatay nga si Jaime Mercado Repuela, 43, taga Proper Barangay Tubod, Minglanilla samtang ang naangol human natapsingan sa bala mao si Franklin Bautista, 47, taga Ward 4 sa mao gihapong lungsod.
Matud ni Police Staff Master Sergeant Oliver Dacua tungatunga sa sugal miabot ang wala mailhing kriminal ug diretsong gipusil si Repuela sa tangkugo niini.
Ang bala nga milapos sa walang aping nilahos ngadto kang Bautista kinsa diha sa atubangan ni Repuela nga nakaingon sa pagkatumba sa duha ug pagkatibulaag sa mga sugarol pagiyahay og panagan dungan sab sa miikyas nga mamumuno.
Wala nay naabtan ang mga mirespondeng mga polis kinsa daling mipadala sa mga biktima ngadto sa Minglanilla District Hospital apan gideklarar nga dead on arrival na si Repuela samtang si Bautista gibalhin sa Vicente Sotto Memorial Center sa Dakbayan sa Sugbo. Wa pa matino sa kapolisan kun unsay motibo sa mamumuno sa pagpatay niini sa biktima. (/IBM)(BANATNEWS)
- Latest
