V-hire terminal sa Kamagayan i-review ni Labella
CEBU, Philippines — Gikatakdang i-review ni vice mayor ug mayor-elect Edgardo Labella iniglingkod niya sa bag-ong katungdanan sa sunod buwan ang terminal sa V-hire diha sa Barangay Kamagayan, Dakbayan sa Sugbo.
Si Labella nagkanayon nga ang operasyon sa terminal walay rekomendasiyon gikan sa city council ug sa terminal accreditation committee.
Si outgoing Mayor Tomas Osmeña nitugot sa operasyon sa V-hire terminal diha sa Barangay Kamagayan niadtong Oktubre 2016.
Sukad niadto, ang mga drayber sa V-hire nagbayad kini og P400,000 matag bulan sa siyudad.
Ang mga kritiko ni Osmeña nikwestyon niini ug nagkanayon nga si Osmeña nakahimo og kalapasan sa City Ordinance 1958 kun “An Ordinance Regulating the Establishment and Operation of Terminals for Public Utility Jeepneys and V-hire vehicles in the City of Cebu”.
Ubos sa ordinansa, ang siyudad obligado sa pagkolekta sa registration fee nga P2,000 matag V-hire unit matag tuig ug ang siyudad obligado nga mangolekta og terminal fee nga ang kantidad sama sa one-way nga pamasahe sa usa ka pasahero.
Ubos usab sa ordinansa nga nagkinahanglan nga ang terminal adunay minimum nga lugar nga 2,000 square meters ug dili kini sulod sa 300 metros radius gikan sa usa ka block nga naglakip sa central downtown area.
Ang kasamtangang v-hire terminal anaa sa 400 metros nga metro-lot sa Barangay Kamagayan nga apil usab sa downtown nga lugar sa siyudad. (/BDB)(BANATNEWS)
- Latest
