105th birthday ni Msgr. Camomot gisaulog gahapon

CEBU, Philippines — Liboan ka mga deboto ni Servant of God Archbishop Teofilo Camomot ang nitambong kagahapon sa hapon sa santos nga misa nga gidumala ni Cebu Archbishop Jose Palma subay sa ika-105 birthday niini.

Ang arsobispo mapasalamaton bisan sa kadaghang obligasyon sa mga deboto anaa gihapon mitambong sa misa alang sa kasumaran sa birthday sa arsobispo.

Sumala niini nga pangandoy usab niya nga maabot ang panahon nga maproklamar si Camomot nga beato ug santo nga lumad nga taga Carcar.

Malaumon si Palma nga maka-impluwensiya si Camomot sa kaparian ug katawhan nga ang Ginoo anaa sa matag kasingkasing diin molambo ang gugma ug maayong buhat alang sa tanan. Gitug-an niini nga magpaabot na lang sila sa resulta sa ilang mga gipadala sa mga dokumento didto sa Roma alang sa pagpamatuod sa “fame of sanctity” ni Camomot.

Si Dr. Jose "Dodong" Gullas, chairman sa The Freeman ug Banat News usa sa mga mitambong sa misa uban ang iyang kapikas nga si Nena, mibutyag nga malipayon siya nga daghang tawo ang mitambong ug malaumon siya nga mas daghan pa ang makaila ni Camomot ilabi na ang mga batan-on ug mga tinun-an. Lakip nga pangandoy niini nga mahingpit na ang pagka santos si Camomot nga usa ka Bisaya, mao nga awhag niya sa katawhan ang pagpadayon sa pag-ampo. (/DILT)(BANATNEWS)