Bucao: Kuwang ang pwersa sa polis sa Talisay

CEBU, Philippines – Ang kakuwang sa pwersa sa kapolisan sa Siyudad sa Talisay maoy nakita nga hinungdan ni Bise Mayor Alan Bucao kini kalabutan sa saway ni Presidente Rodrigo Duterte.

Si Bucao nagkanayon nga nakita niya mismo nga diyotay lang ang gidaghanon sa mga polis nga nadestino sa Talisay.

Matud ni Bucao nga mismo siya nibisita sa Barangay Tanke nakasaksi sa mga polis nga nag-anam og kagamay.

Sa nasayran, ang Police Regional Office (PRO)-7 nibutang sa Regional Mobile Force Battalion (RFMB)-7 diha sa Barangay Tanke gawas sa orihinal nga pwersa sa mga polis sa Talisay.

Apan naibanan ang RMFB tungod kay gibutangan usab ang Lungsod sa San Fernando.

Sa pagbisita ni Duterte dinhi sa Sugbo nalakip ang Talisay sa iyang mensahe tungod sa suliran sa ilegal nga drugas nga walay pagkakunhod.

Si Bucao nipadayag   nga dili sa ingon nga wala sila’y polical will apan ang kakuwang sa polis maoy hinungdan.

Ug gani ang lokal nga kagamhanan sa siyudad wala magkuwang sa suporta ngadto sa mga polis sama sa sakyanan ug ubang mga kinahanglan.

Kabahin usab sa operasyon adunay agi usab ang kapolisan sa siyudad ug gani adunay mga ilegalista ang nangamatay atol sa mga operasyon tungod kay nisukol kini sa kapolisan. (/BDB)(BANAT NEWS)