Mayor Cesante nanawagan nga dugangan ang polis sa Dalaguete

CEBU, Philippines — Si Mayor Ronald Allan Cesante sa Lungsod sa Dalaguete nanawagan nga dugangan og mga polis ang ilang lungsod .

Kini human nipagawas og travel advisory batok sa pagbisita sa maong lungsod ang kagamhanan sa United Kingdom (UK).

Una natapos ang tuig 2018, ang Foreign and Commonwealth Office (FCO) sa UK niawhag sa ilang mga lumulupyo nga dili mobisita sa Mindanao ug sa mga lungsod sa habagatang bahin sa Sugbo lakip sa Dalaguete ug Badian tungod sa mga hulga sa terorismo.

Ang maong advisory gi-update human sa nahitabong pagpamomba sa usa ka mall didto sa Cotabato City gamit ang usa ka improvosed explosive device (IED) nga nikutlo og duha ka kinabuhi.

Si Cesante nagkanayon nga hangtud karon natingala siya sa pag-apil sa travel advisory sa UK sa ilang lungsod.

Gilantaw niya ang maong travel advisory isip suporta aron mahatagan og gibug-aton ang iyang request sa provincial police nga dugangan ang mga polis sa Dalaguete.

Sa pagkakaron adunay 20 ka personnel ug upat ka non-uniform personnel (NUP) ang Dalaguete Police Station (DPS). Dugang ni Cesante nga ang maong gidaghanon sa police personnel sa lungsod dili kini tukma sa 72,000 ka populasyon niini wala pay labot sa mga turista nga mobisita sa lungsod.

Ug gani ang kagamhanan sa Dalaguete nidestino na kini sa ilang Civil Security Unit (CSU) diha sa police sub-station sa Mantalongon diin ang maong lugar maoy sentro sa agri-eco ug adventure tourism sa lungsod. (/BDB)(BANATNEWS)