Tax payers sa siyudad ibulgar sa publiko

CEBU, Philippines – Nagtinguha si Cebu City Mayor Tomas Osmeña nga i-post online ang ngalan sa mga business establishments nga regular gyud nga nagbayad sa ilang buhis sa siyudad aron ang publiko mahibawo kun kinsa ang mga tax evaders.

Gipahibawo sa mayor ang iyang plano isip pamaagi sa paggukod sa mga business establishments nga nakalapas sa omnibus tax ordinance sa siyudad.

Ang executive department pinaagi sa tabang sa City Treasurer’s Office nag-andam na sa lista.

“We will put all of these in the internet so you can check and then people can check also,” matud ni Osmeña.

Kun mahingpit na, ang mayor niasoy nga motanyag siya og ganti sa mga mosumbong sa mga establisemento nga wala nagbayad og buhis diin ang reward nga ihatag magsugod sa P1,000 ngadto na sa P50,000 ug kini kuhaon sa intelligence fund sunod tuig.

Ang mayor moumol og grupo nga maoy mopasira sa mga business establishment nga nag-operate apan wala’y business permit ug wala nagbayad og buhis.

Wala mahadlok ang mayor nga kalagutan siya sa mga Sugbuanon tungod kay gihimo niya kini isip pinili nga opisyal sa Siyudad sa Sugbo.

Gitataw sa mayor nga wala siya’y labot sa business permit apan ang importante niya nga mobayad gyud og buhis sanglit bilyones ka pesos ang nawala nga tax revenues.

Sigun niini nga dili mominus 10,000 ka business establishments ang giingong wala’y business permit ug wala nibayad og buhis. (/GMR)(BANAT NEWS)