Kapin 300 ka kawani sa CITOM gi-drug test
CEBU, Philippines – Kapin sa 300 ka kawani sa Cebu City Hall nga nadestino isip mga traffic enforcers ug mga parking aides gipakalitan og drug test atol sa ilang general meeting kagahapon.
Hangtud hinoon kagahapon sa hapon, ang private laboratory company nga gi-hire sa City Office for Substance Abuse Prevention (COSAP) sa pagpahigayon sa drug test, wala pa makapagawas sa resulta.
Matud ni Garry Lao, pangulo sa COSAP, nga dugay’ng nahuman ang pagpagawas sa resulta tungod sa kadaghan sa mga gihimoan og drug test, ug hapon na sila nga nahuman.
Tungod kay Sabado man kagahapon ug menos ra ang problema sa trapiko, ang kadagkoan sa CITOM mipatawag og general meeting sa ilang mga sakop aron paghatag kanila og mga pahimangno.
Si Lao miingon nga ang mga sakop sa CITOM lisud kaayo nga mahimoan og dungan nga drug test kay dili man kabiyaan ang ilang mga pwesto, gawas lang kon weekend.
Matud ni Lao nga gipahimuslan niya ang higayon dihang nasayod siya nga may general meeting ang mga sakop sa CITOM pinaagi sa pag-coordinate sa mga opisyal niini.
Bisan si CITOM operations chief Francisco “Isko” Ouano miingon nga gusto gyud siya nga mataktak na paghurot ang mga traffic enforcers nga nagumon sa drugas.
Si Mayor Tomas Osmeña daan na nga miingon nga dili siya mahinugon sa pagtaktak sa trabaho sa mga kawani sa Cebu City Hall nga mga tigamitan og gidiling drugas.
Ang mga kawani sa CITOM pulos mga kaswal mao nga sayon ra kaayo sila nga taktakon sa trabaho kon mamatud-an nga positibo sa drug test. (BANAT NEWS)
- Latest
