Daanbantayan iapil sa EWAS

CEBU, Philippines — Gawas sa tibuok Lungsod sa Tuburan, gitun-an sab nga malakip sa Election Watchlist Areas (EWAs) ang Daanbantayan nunot sa gikatahong political rivalry sa lugar.

Kini ang gibutyag ni Cebu Provincial Police Office Director, Senior Supt. Edgar Alan Okubo, samtang si Police Regional Office-7 Director, Chief Supt. Robert Quenery, niingon nga kun adunay malakip sa EWAs kutob ra kini sa category 1.

Ang category 1 mao kadtong adunay presensya sa drugas, grupo sa mga durugista, proliferation of firearms ug presensya sa criminal gangs.

Samtang ang 2 hangtud 4 naglambigit na sa presensya sa mga terorista.

"I am confident na kung meron mang watchlist areas ay nasa category one lang," si Quenery niingon.

Atol sa meeting sa Joint Peace and Security Coordinating Council kagahapon sa CPPO, gibutyag ni Okubo nga ang tibuok Lungsod sa Tuburan ang ilakip sa EWAs sa piniliay sa Barangay.

Ang JPSCC gilangkuban sa kapolisan, Armed Forces of the Philippines-Central Command ug Commission on Elections.

Duha ka barangay sa Tuburan ang adunay election related violence sa nakalabay nga eleksyon apan gitataw ni Okubo nga ilang irekomendar nga ang tibuok lungsod gyud ang ipaubos sa EWAs sanglit magbalhin-balhin og barangay ang mga kriminal.

Dugang usab ni Quenery nga iyang adtuon ang uban pang probinsiya sa Central Visayas karong semanaha aron pagtuki sab sa mga EWAs niini ilabi na sa Negros Oriental. (GMR) (BANAT NEWS)