Grupo sa mga batan-on nigara sa Talisay City

CEBU, Philippines - Gitug-an sa presidente sa Association of Barangay Council sa Siyudad sa Talisay nga nibalik sa pagsulbong ang pipila ka grupo sa mga batan-on sa maong dakbayan nga maoy naghatag og kagubot.

Gani aduna na say laing nakalas tungod sa panagbangi sa magkaribal nga grupo niadtong miaging Domingo.

Si Kapitan Raul Cabañero sa Barangay Bulacao nipadayag nga masumpo nila ang maong problema kun molihok ang opisyales sa barangay. Apan daghan sa kabarangayan ang dili aktibo sa curfew.

Gipasabot ni Cabañero nga mapul-an ang opisyales sa pagpatuman sa curfew tungod kay ang ilang hatdan sa mga dinakpang batan-on nga mao ang Department of Social Welfare and Development, dili sab aktibo sa maong programa ug dili consistent.

Matud pa niya nga unta dugangan og ngipon ang naaprubahan nga ordinansa labot niini ug ang mga ginikanan maoy mas labing hatagan og saktong silot aron sila maningkamot nga mahipos ang ilang mga anak panahon sa kagabhion.

Nasayran nga tulo ka grupo sa mga batan-on nga bag-ong sulbong karon sa Talisay ug kini mao ang Kalmados, Stay True Young (STY) ug Spartans.

Kasagarang sakop niini nagpangidaron og 9-anyos ngadto sa 20-anyos. Apan kasagaran nga makita sa kadalanan nagpangidaron og 9 ngadto sa 17-anyos. Gani daghan na nga mga tawo ang nanawagan sa gobiyerno sa pagpitol niining kalihukan sa mga kabatan-onan pinaagi sa social media.

Sa labing ulahi nga hitabo, usa ka 16 anyos nga babaye nga sakop sa Kalmados ang namatay human gipusil sa kaatbang niining grupo nga STY niadtong Domingo sa kadlawon. (BANAT NEWS)