V-hire terminal mas daku og kita kaysa sa bangko

CEBU, Philippines - Gipahibawo ni Konsehal Raymond Garcia kinsa maoy chairman sa Committee on Laws sa konseho sa Dakbayan sa Sugbo nga naaghat siya sa pagpasaka og reklamo sa Office of the Ombudsman batok kang Mayor Tomas Osmeña gumikan kay daghan kini og nahimong kalapasan sa pag-operate og V-hire terminal sa Brgy. Kamagayan.

Gipasabot ni Garcia nga naghimo siya og pakisusi labot sa maong terminal ug nakita niya nga daghan kini’g nalapas sa City Ordinance 1958. Ang maong ordinansa, mao ang pag-regulate sa mga establisemento ug operation sa terminal alang sa Public Utility Jeepneys ug V-hire terminal sa siyudad nga nahimong balaod niadtong tuig 2003 human pirmahi ni Mayor Osmeña.

Matod sa konsehal, tataw ug klaro nga nakalapas ang mayor sa maong ordinansa kay giingong wala kini mosunod sa insaktong proseso.

Sigon niini, ang mayor kusog manggukod sa mga kompaniya nga wala mosunod sa balaod apan siya mismo wala motuman sa nakalatid sa balaod.

 Masaligon ang konsehal nga wala’y lusot ang kampo ni Osmeña sa kasong kriminal nga iyang gipasaka.

 Sa iyang bahin si Mayor Osmeña miingon nga accredited ang maong terminal ug kini mao ang Citilink, apan nawagtang kini human gibalhin ni kanhi mayor Michael Rama sa laing lugar.

Iyang gikwestiyon kun nganong wala pasakahi og kaso si Rama lakip na  si kanhi City Administrator Lucille Mercado nga ang pagbalhin sa Citilink wala man sab moagi sa konseho.

 Asoy sa mayor nga wala’y katungod ang pikas kampo nga hatagan siya og lecture kalabot niini kay mismo ang Team Rama wala mosunod sa rules and regulations.

 Una nang gipasabot ni Osmeña nga gitugutan niya ang operasyon sa maong terminal kay daghang pasahero gikan sa habagatang Sugbo ang nanarbaho sa siyudad.

Nasayran nga ang matag v-hire, mobayad og P100 matag adlaw ug base sa December 2016 ang siyudad nakakolekta og P446 mil sulod sa usa ka buwan. Hinungdan nga gikompara niini ang kita sa terminal ug sa business tax sa Banco De Oro.

 “Ang v-hire, P446, 000 in 1 month against 26 branches in 1 year. Mas dako pa ang collection sa v-hire. Akong pangutana, ‘Hoy naunsa man mo? How come you don’t attack BDO, asa ka mangita niana”, sigon sa mayor.

 Dugang niini nga mas maayo pang sirad-an ang maong bangko inay ang terminal. (BANAT NEWS)