Drug rehab sa Simbahan hilom lang
CEBU, Philippines - Wala matulog ang Simbahan sa pagtabang sa kagamhanan may kalabutan sa kampanya batok sa ilegal nga drugas.
Kini ang gitug-an ni Fe Barino, ang chairman sa SuGod Program ug Love of Community Program.
Matud pa ni Barino, wala sila natulog tungod kay niadtong Agosto 14-26, 2016 nipahigayon sila sa unang Surrender to God Program sa Archdiocese of Cebu isip tubag sa una pa lang panawagan ni Presidente Rodrigo Duterte nga tabangan ang kagamhanan sa rehabilitation program sa Simbahan.
Sumala pa ni Barino, sugod batch 1 hangtod kagahapon ikaunom na kini nga batch sa ilang napaubos sa rehabilitasyon nga dul-an na sa 500 ka mga drug surrenderees gikan sa nagkadaiyang lugar sa Sugbo.
Dugang pa ni Barino, sa kwarenta ka buok nigradwar kagahapon 35 ang gidala sa mga nagkadaiyang grupo ug mga barangay opisyal sa Love of God Community aron ipaubos usab sa SuGod Program.
Gitug-an ni Barino, dili buluhaton sa Simbahan ang ipanghambog ang ilang nahimo kay bisan sa hilom aduna silay nahimo bisan ginagmay alang sa kabag-ohan sa mga kanhi drug dependents.
Si Barino, nibutyag adunay mga gradwado sa programa ang ni-graduate usab og skills program sama sa bake and pastry, welding ug uban pa.
Gipahibalo ni Barino, bukas na usab sila sa ilang ikapito nga batch karong Marso 28 hangtod sa Abril 6 ug gipaabot nga ubay-ubay ang moapil sunod nga batch.
Atol sa pagtapos sa programa sa ikaunom nga batch kagahapon gidasig sila ni Archbishop Jose Palma nga ipadayon ang paglikay sa dautang bisyo ug magpasalamat sa grasya nga nadawat ug padayonon ang pagkamainampoon. (BANAT NEWS)
- Latest
