Septic tanks sa mga prisohan gihabwaan kay nialisngaw

CEBU, Philippines - Aron masulbad ang problema sa nasinating kabaho sa mga residente sa Brgy Kalunasan gikan sa inalisngaw sa mga septic tank sa Cebu City Jail ug Cebu Provincial Detention and Rehabilitation Center (CPDRC) nga giingong miawas, subling kuhaon sa siyudad ang serbisyo sa Mactan Rock Industries Inc.

Kahinumduman nga gikuha na kaniadto sa siyudad ang serbisyo sa maong kompaniya apan naundang human matud pa wala mabayri.

Matud ni Bimbo Fernandez, Executive Assistant to the Mayor nga gipangayuan na nila og proposal ang maong kompaniya ug gipasaligan nga bayran sa ilang serbisyo. Ang Mactan Rock Industries Inc. dunay sewage treatment plant (STP) diin ang tubig gikan sa septic tank i-agi sa STP ug i-purify aron mapahimuslan ang tubig.

Gipahibawo ni Fernandez nga nagtagbo na sila sa mga kadagkuan sa Environmental Management Bureau (EMB-7), Cebu City Jail ug CPDRC diin ilang gituki ang baho nga gireklamo sa mga residente.

Samtang nagpaabot sa serbisyo sa Mactan Rock Industries Inc., gihabwaan una og hugaw sa siyudad ang mga septic tank sa city jail.

Makigtagbo usab si Fernandez sa kagamhanan sa Probinsiya aron matabangan sila nga i-declog ang mga septic tank sa CPDRC ug ang hugaw adto ilabay sa STP sa siyudad nga sa dili madugay ma-iya na sa probinsiya.

 Ang barangay mihimo usab og pamaagi aron maatiman og insakto ang hugaw sa matag panimalay ug gawas niini adunay engineering solutions nga pagahimoon aron dili na moalisngaw pa ang baho.

Gipasabot ni Fernandez nga kun mopadala og request ang Kapitoyo, iya kining iduso

kang Mayor Tomas Osmeña alang sa approval niini. (BANAT NEWS)