Pag-ilis og imbestigador gisupak sa reklamante
CEBU, Philippines - Gisupak sa reklamante batok sa usa ka opisyal sa Land Transportation Office sa Dakbayan sa Mandaue ang pagtugyan sa iyang reklamo ngadto sa laing imbestigador human sa kapin duha ka tuig nga wala kini hatagi og aksiyon.
Si Jovert Nemenzo, pangulo sa National Confederation of Tricycle and Operators Association in the Philippines (NACTODAP)-Mandaue Chapter, nipadayag sa iyang pagsupak human ang iyang reklamo batok ni Cynthia Duterte, ang acting chief sa Mandaue Licensing Center, gipasa ngadto sa bag-ong pangulo sa Regional Administrative Action Board (RAAB) nga si Atty. Vicente Gador Jr.
Ang reklamo ni Nemenzo batok kang Cynthia Duterte, gisang-at niadtong Septiyembre 30, 2014 gumikan sa giingong pagpugong sa pagpagawas sa mga certificates of registration ug official receipts sa wala masayri nga rason niadtong supply officer pa kini sa LTO-Mandaue.
Ang kanhi pangulo sa RAAB, LTO-7 acting director Alita Pulga, ang nagkupot sa reklamo apan giingong walay nahitabong imbesti-gasyon.
Si Aden Belza, officer-in-charge sa Administrative Division sa LTO-7, niadtong Oktubre 12, 2016 nipahibawo kang Nemenzo nga ang reklamo gitugyan na ngadto kang Gador.
Apan si Nemenzo sa iyang suwat niadtong Nobiyembre 9, 2016 nikuwestiyon sa pagpasa sa reklamo gikan kang Pulga ngadto ni Gador.
Buot ni Nemenzo nga si Pulga gyud ang moimbestigar sanglit kini man ang unang gitahasan sa pag-imbestigar ug mismo ang buhatan sa Ombudsman pa ang nimando niini. (BANAT NEWS)
- Latest
