Mga konsehal ni Reluya dili kaalyado
CEBU, Philippines - Sama niadtong 2010, dili gihapon kaalyado ni San Fernando mayor-elect Lakambini “Neneth” Reluya ang mayoriya sa konseho sa lungsod nga gipangulohan ni vice mayor-elect BB Sabalones.
Si Reluya sakop sa Alayon Party samtang si Sabalones sa Nationalist Peoples Coalition.
Apan matud ni Reluya nga niining higayona iyang pasabton ang konseho aron siya abagan tumong sa paghatag og serbisyo sa katawhan.
Niadtong dili niya kaalyado ang mga konsehal, matud ni Reluya nga wala kaayo’y mga serbisyo o proyekto nga naimplementar tungod sa ilang panagsumpaki.
Buot ni Reluya nga bag-uhon ang dagway sa lungsod diin tutukan niya ang pagpanghatag og serbisyo sa katawhan ilabi na sa social services.
Si Reluya nga nahinabi sa Banat News kagahapon nagpasalamat sa mga nisuporta kaniya ug nisaad nga hinay-hinayon nila ang kausaban ug i-empower niya ang matag pamilya sa lungsod.
Matud ni Reluya nga ang kasamtangang administrasyon karon wala makatutok sa mga proyekto sa lungsod ilabi na sa social services.
Ang mga mag-uuma ug mananagat giingong wala makabatyag og serbisyo gikan sa gobiyerno. (BANAT NEWS)
- Latest
