Wa’y sayop ang pagdeklarar og persona non grata—DILG

CEBU, Philippines - Wala’y nakitang sayop ang kadagkoan sa Department of the Interior and Local Government (DILG-7) kalabot sa pagpasar og resolusyon sa konseho sa dakbayan sa Talisay nga mideklarar og Persona Non Grata sa ilang city administrator nga si John Yre de los Reyes.

Si Atty. Ayesh Nogra, ang legal officer sa DILG-7, nagkanayon nga ang maong resolusyon mao ang pagpadayag lang sa konseho sa ilang gibati ngadto sa usa ka tawo nga giisip nila nga wala maghatag og kaayohan sa ilang dapit.

Apan gitataw ni Atty. Nogra nga kun ang resolusyon nga nagdeklarar ni De Los Reyes nga persona non grata gitumong aron pagpugong sa iyang katungod bahin sa politikanhong kalihukan, si De Los Reyes makahimo na sa pagkuwestyon sa resolusyon.

Sa nasayran, si Konsehal Aldin Diaz maoy nangamahan sa resolusyon pagdeklarar nga persona non grata sa anak ni Mayor Johny De Los Reyes tungod sa iyang pagbugal-bugalan sa konsehal ug sa iyang pamilya diha sa social networking (Facebook) ug ingon man sa iyang binayran nga programa sa radyo.

Si Konsehal Diaz nagkanayon nga dili lang siya ang gibugal-bugal sa city administrator, kon dili, lakip ang kinatibuk-ang konseho sa Talisay. Matud ni Diaz nga wala’y problema kun komentaryohan siya sa iyang trabaho isip konsehal, apan matud pa nga personal ang atake kaniya ni John Yre.

Sa laing bahin, giuyonan usab sa konseho sa Talisay ang resolusyon ni Konsehal Diaz nga nag-awhag sa Civil Service Commission (CSC) ug DILG-7 sa pag-imbestigar ni John Yre kinsa giingong nibiya sa iyang asawa ug nikuyog sa laing babaye.

Matud ni Diaz nga ang usa ka public official kinahanglang magbaton og pamatasan ug dili muhimo’g immoral nga binuhatan sama sa nikatap nga estorya bahin sa gihimo sa city administrator.  (BANAT NEWS)