Paggamit sa social media butanga’g age limit

CEBU, Philippines - Ang gobiyerno sa Sweden nisugyot nga limitahan na ang edad sa mga batan-ong makagamit sa social media nga kabahin sa gilusad nga data protection rules nga gipatuman karon sa European Union (EU).

Matud pa sa maong nasud ilaha karong gitimbangtimbang ang edad nga 13 ngadto sa 16 lamang ang tugotang makagamit sa social media ug kini gikatakdang mapinalisar sa Disyembre niining tuiga sumala pa sa report sa Interaksyon.Com.

Sumala pa ni Consumer Minister Per Bolund sa Swedish Television, kadtong mga menor de edad nga gustong makagamit sa social media kinahanglang adunay pagtugot gikan sa ilang mga ginikanan o guardians.

Apil sa maigo sa maong estriktong pagpatuman sa data protection rule ang sikat na kaayong Facebook . Matud pa nga ang maong bag-ong balaod   gituyo aron maproteksyonan ang kabataan gikan sa mga dautang mga elemento ug aron usab matunghay ang pagpatuman sa bag-ong balaod. (BANAT NEWS)