Nanguha’g tarpaulin nikirig

CEBU, Philippines – Kritikal ang kahimtang sa 32-anyos nga lalaki human giingong nakuryentihan dihang nanguha og tarpaulin ibabaw sa atop sa skywalk sa Osmeña Blvd. ning Dakbayan sa Sugbo kagahapon sa udto.

Ang nakuryentihan mao si Noli Cesiban, taga Sitio Tabay Lawom, Brgy. Tisa ning dakbayan.  Matud pa ni Senior Police Officer 4 Rogelio Cañete, imbestigador sa Homicide Section sa Cebu City Police Office sa Banat News, naputos sa paso ang lawas ni Cesiban.

Sumala pa ni Cañete nga ang wire nga nakakuryente sa biktima mao diay usab kadto nga wire nga nakakuryente sa duha ka mga batang namatay sa nakalabay nga semana.

Sa imbestigasyon sa kapulisan ilang nasayran nga mikatkat sa atop sa maong skywalk si Cesiba aron manguha og mga tarpaulin sa taas.

Apan aksidente niini nga nahawiran ang linya sa kuryente hinungdan nga kini mibuto ug nalabay sa atop sa skywalk, matud pa nga nangalangkat ang panit sa kamot ug tiil niini.

Si Cañete miingon nga niadtong orasa atol sa hitabo didto ra sila sa duol sa nahitaboan kay naniudto ug natingala na lang sila nga napalong ang kuryente sa ilang gikan-an.

Ang mga sakop sa Department of Health nga nakakita sa hitabo ang dali nga mitabang ni Cesiban nga naghigda ug nag-agulo sa atop sa skywalk apan miligid kini ug wala na masawo pa sa mga sakop sa DOH ug nabunal sa aspaltadong dalan.

Gidala sa Vicente Sotto Memorial Medical Center (VSMMC) biktima nga talandugon ang kahimtang.

Sa update nga gipaabot ni Cañete sa Banat News kagahapon sa alas 3 sa hapon, gibalhin sa Intensive Care Unit (ICU) sa VSMMC si Cesiban ug pabiling kritikal ang kahimtang samtang gi-ayo na usab sa kontraktor sa VECO ang linya sa kuryente. – /EIM) (BANAT NEWS)