Kasong gipasaka sa UP gibasura sa korte
CEBU, Philippines – Gibasura sa korte ang kasong sibil nga gipasaka sa University of the Philippines Cebu batok sa Cebu City Government tungod kay walay otoridad si Dean Liza Corro nga morepresentar sa maong unibersidad aron makakiha.
Ang maong kaso gipasaka sa UP-Cebu aron ipahunong ang reblocking ug pagtukod og balik sa mga nasunogan sa ilang mga balay diha sa Sitio Avocado, Brgy. Lahug.
Matud pa sa gipirmahang resolusyon ni Presiding Judge Ricky Jones Macabaya sa Regional Trial Court (RTC) Branch 5, way napakitang dokumento si Corro nga naghatag kaniya og gahom aron makakiha isip representante sa unibersidad.
Sumala pa nga ubos sa Section 1(d) sa Rule 16 sa Rules of Court dili mahimong makakiha ang usa ka tawo kun wala siyay legal capacity to sue.
Ug sa kaso sa UP-Cebu ug ni Corro, mahimo lamang makakiha ang UP kun ang Chancellor o ang President of the University System maoy mokiha subay sa Minutes sa 1151th Board of Regents Meeting. Tungod kay wala man siya’y awtorisasyon, walay bili ang kasong sibil nga iyang gipasaka hasta ang pagpirma sa certification of non-forum shopping.
“The authority of Dean Corro to sue for and in behalf of the University of the Philippines in this case is not presumed as it is her obligation to clearly establish and prove her authority by evidence as mere allegation is not evidence,” matud pa sa resolusyon ni Macabaya.
Una niini, ang mga abogado sa Dakbayan sa Sugbo mikwesyon sa legal capacity ni Corro isip representante sa UP-Cebu pagkiha sa dakbayan.
Ang kabalayan sa Sitio Avocado nasunog niadtong Disyembre 24, 2015 ug isip maoy tag-iya sa luna, buot sa UP nga gamiton ang 2,000 square meters sa 4,000 mil square meters nga luna sa UP diha sa maong lugar, apan gisupak sa mga molupyo nga gustong mopuyo og balik sa dapit. (Sheriza Mae R. Uy/EIM)(BANAT NEWS)
- Latest
