Gibiyaan sa kapuyo naghikog gamit ang alambre

CEBU, Philippines - Patay ang usa ka 39-anyos nga lalaki nga gituohang naghikog gamit ang electrical wire nga gihigot sa iyang liog didto sa Sitio Anapog, Barangay Cantubaon, Tabuelan kaniadtong Biyernes sa udto.

Si PO3 Arestio Magseco sa Tabuelan Police Station miila sa namatay nga mao si Eleazar Bandolon, mag-uuma ug nagpuyo sa maong dapit. Giingon nga wala na makaagwanta si Bandolon sa iyang kaguol nga  gibiyaan siya sa iyang kapuyo.

Matud ni PO3 Magseco nga ang kapuyo ni Bandolon nilakaw ug  maoy hinungdan nga mibati kini og dili tiaw nga kaguol. Nadiskubrehan sa pipila ka sakop sa ilang pamilya nga si Bandolon nagbitay na sa alambre.

Ang pikas tumoy sa alambre gibalighot ni Bandolon didto sa ibabaw nga bahin ug ang pikas nga tumoy maoy gigamit paghigot sa iyang liog aron siya mabitay ug mamatay.

Si PO3 Magseco miingon nga dali unta nga gitangtang sa mga sakop sa pamilya ang gihigot nga electrical wire ug gihatod nila si Bandolon sa municipal health center apan ang doktor mideklarar na nga patay nang daan ang maong tawo.  (BANAT NEWS)