DILG Secretary Sarmiento miduaw sa haya ni PO2 Jurbina

CEBU, Philippines – Personal nga gibisita ni Department of Interior and Local Government (DILG) Secretary Mel Senen-Sarmiento ang pamilya ni Police Officer 2 Dionelio Jurbina kinsa gihaya didto sa ilang panimalay sa sitio Bakhaw, barangay Catmondaan, lungsod sa Catmon kagahapon.

Si PO2 Jurbina napatay atol sa engkwentro sa kapulisan ug sa grupo sa mga armadong lalaki sa sitio Buyo, barangay Binongkalan, sa maong lungsod pipila ka adlaw na ang nakalabay.

Uban ni DILG Secretary Sarmiento si Police Regional Office (PRO)-7 Regional Director Prudencio Tom Bañas, hepe sa Catmon Police Senior Inspector Roberto Hugo, ug  mayor sa lungsod nga si Dan Jusay.

Gipasalig usab ni Sarmiento ngadto sa pamilya nga duna sila’y madawat nga benepisyo gikan sa Philippine National Police (PNP) ug National Police Commission (Napolcom). Tabangan usab sa ahensiya ang anak sa namatay nga pulis nga makahuman sa iyang pagtungha ilabi na gusto usab kini mosunod sa propesyon sa iyang amahan nga usa ka pulis.

Gumikan sa hitabo, si Sarmiento nagkanayon nga gilakip nila sa pamaliton alang sa mga polis ang bullet proof vest alang sa tanang police stations aron adunay magamit kun motubag sila og mga alarma.

“Ato sila gitagaan og instructions to go all out against any forms of criminal activities but we also have to protect them and body armor is very important,” matud pa ni Sarmiento. Kahinumdoman nga si Presidente Benigno Aquino III sa usa sa mga nauna niyang mga state of the nation address (SONA) mipasalig kini nga mamalit og armas ang kapolisan aron sa ingon di na sila kinahanglang mangutang aron duna sila’y madala sa ilang pag-duty.

Samtang ang nabiyaang kapikas sa kinabuhi ni PO2 Jurbina nga Susan nagkanayon nalipay siya sa atensyong gihatag sa gobiyerno kanila sa panahon sa ilang kasubo.

Karong adlaw’ng Sabado, petsa 14 ilubong ang iyang bana.  (Decemay P. Padilla/EIM)

LGUs, NGOs naghiusa pagpanalipod sa Tañon Strait

Mga ahensiya sa gobiyerno ug pribadong sektor naghiusa alang sa pagpanalipod ug pagpalambo sa Tañon Strait taliwala sa Sugbo ug sa isla sa Negros nga usa ka labing dako nga marine protected area sa nasud karon.

Ang Ocean ug Rare nga parehong non-government organization (NGO) ug kagamhanan sa probinsiya nagkasabot nga panalipdan gikan sa pagpangabuso ang maong kadagatan.

Niining ulahi lang, si Atty. Gloria Estenso-Ramos sa Oceana Philippines uban sa mga representante sa nagkalain-laing organisasyon nakigtagbo kang Bise Gobernador Agnes Magpale, Bureau of Fisheries and Aquatic Resources Assistant Regional Director, Allan Poquita ug Atty. Chad Estell, hepe sa Provincial Environment and Natural Resources Office (PENRO) aron hisgutan ang ilang buhaton.

Lakip usab sa misalmot sa maong tigom ang Bloomberg Philanthropies nga girepresentahan nila ni Susan Rufo ug Antha Williams nga mipaila sa Vibrant Oceans Initiative program nga gilusad niadtong tuig 2014. Ang maong grupo nag-adbokasiya sa proactive nga pamaagi batok sa ilegal nga panagat ug uban pang marine issues.

Ang Tañon Strait Protected Area Management Board gilangkuban kini sa 350 ka miyembro gikan sa nagkalain-laing sektor.

Ang maong grupo maghatag og public awareness campaign, mag-promote sa balaod sa pagprotekta sa seascape ug responsableng pagdumala sa kadagatan.

Si Poquita nagkanayon nga ang BFAR magpadayon sa pagtudlo sa mga mananagat og alternatibong panginabuhian ug mohingusog usab sa pagpatuman sa balaod batok sa mga ilegal nga mga mananagat.

Ning bag-o lang, gipatuman na ang naamendahang Republic Act 8550 nga RA 10654 nga mao ang Fishery Code of the Philippines nga adunay mas bug-at nga silot niadtong ilegal nga mananagat.

Ang BFAR-7 migahin og P40 milyones niining tuiga alang sa maong mga kalihokan. – /EIM) (BANAT NEWS)