16 ka Danao City employees adik
CEBU, Philippines – Disesayis ka mga kawani sa Danao City Hall ang nagpositibo sa gipahigayong drug test kagahapon sa Cebu Provincial Anti-Drug Abuse Council (CPADAC), gawas niini dunay usa nga miangkong tiggamitan siya og shabu.
Ang hepe sa CPADAC, Joey Herrera nagkanayon ipaubos pa nila sa confirmatory test ang resulta, ug kung makompirmar nga tiggamitan sila og ginadiling drugas palagputon sa trabaho ang mga job order employees samtang ipaubos sa proseso kun sila regular nga kawani.
Adunay 195 ka kawani sa city hall nga regular ug job order employees ang gipaubos sa drug test diha sa buhatan sa mayor sa siyudad subay sa hangyo sa mga opisyal sa siyudad.
Ang CPADAC maoy nag-supervise sa nahisgutang drug test subay sa kampanya sa lalawigan batok sa ginadiling drugas ug sa programa nga “drug free work place.”
Gawas sa mga kalungsuran ang CPADAC miawhag usab kini sa Department of Education sa probinsiya nga mapaubos sa drug test ang mga magtutudlo. Kini human nga dunay mga magtutudlo ang suspetsadong nalambigit sa paggamit og ginadiling drugas. – /EIM) (BANAT NEWS)
- Latest
