Naninda’g sigarilyo duol eskuylahan panakpon

CEBU, Philippines – Gimandoan ni Cebu City Councilor Nida Cabrera ang pangulo sa Cebu Environmental Sanitation and Enforcement Team (CESET) nga panakpon ang mga manindahay og sigarilyo duol sa mga tunghaan sa dakbyan sa Sugbo.

Matud ni Cabrera base sa Cebu City Ordinance 2241 kon Anti-Smoking Ordinance nga gipasar niadtong 2010, gidili ang pagpanigarilyo sa publikong lugar. Dugang pa niini ang Republic Act 9211 nagdili gyud sa pagtinda og sigarilyo sud sa 100 ka metros gikan sa eskuylahan, kun duha ka basketball courts ang distansya.

Base usab sa datos sa Department of Health, 47% sa mga kabataan karon sa Pilipinas ang nanigarilyo nga nag-edad gikan 12 hangtud sa 18 anyos.

Matud ni DOH Health Education and Promotion Officer Ma. Ligaya I. Moneva nga nakahinabi sa Banat News,  unom kada napulo ka bata ang manigarilyo hinungdan nga makaalarma na kini.

Sa pagpahugot sa ordinansa, si Konsehal Ritchie Osmeña nisugyot sa konseho sa pag-amendar ug naaprubahan nga patas-an ang multa niadtong mga masakpang manigarilyo sa pampublikong dapit.

Dunay multa sa unang kalapasan nga P3 mil,P4 mil sa ikaduha ug P5 mil sa ikatulo ug pagkapriso og usa ka tuig.

Samtang si Committee on Education Chairman Konsehal Alvin Dizon nisugyot sa mga tunghaan nga motabang usab sa pagmonitor sa mga tindahan ug sa mga tinun-an nga manigarilyohay.

Nabantayan sa Banat News nga dunay mga tinun-an nga anha lang manigarilyo duol sa ilang mga tunghaan ug napalit ang ilang mga sigarilyo gikan sa mga naninda niini sud sa 100 ka metros gikan sa mga tunghaan.

Si Bryan Maningo, Safety and Security Department sa University of San Jose - Recoletos sa Cebu City miingon, dugay na silang nireklamo kabahin sa mga namaligya og sigarilyo duol sa ilang tunghaan apan wala kini lihoka sa siyudad.

Matud niya andam silang makigtagbo sa kadagkoan sa siyudad aron mahawan ang maong mga cigarette vendors. – /EIM) (BANAT NEWS)