Maayo’ng buhat, hugot nga pagtuo batonan

CEBU, Philippines – Ang kahiusahan sa tanan, maayong buhat ug hugot nga pagtuo sa Ginoo ang sentro sa homiliya ni Cebu Auxiliary Bishop Emilio Bataclan atol sa Misa Pontipika sa kapistahan ni Senior Santo Niño kagahapon sa alas 6:00 sa buntag.

Si Bataclan ang nangulo sa misa tungod kay si Arsobipso Jose Palma didto sa Manila gumikan sa pagbisita sa Santo Papa. Gipaagi ni Bataclan og komediya sa iyang homiliya diin gihisgutan niya ang gisul-ob nga kapote sa Santo Papa nga niadto sa Tacloban nga pareho ang kolor sa kapote sa mga manimbahay.

“Visible kaayo ang pagsul-ob sa Santo Papa nga pareha ra diay ta adunahan ug kabus pareho lang ang hangin nga atong gihingos,” ni Bataclan pa.

Lakip sa homiliya mao nga dunay mga tawo nga imbes magpasalamat sa mga grasya’ng nadawat magpunay na hinuon og reklamo sa iyang kahimtang tungod kay wala moabot ang ilang gilauman sa kinabuhi nga dili makaayo kanila.

“Testingan gyud ta, God who loves the world he sent His Beloved Son, usahay magpili man gud ta unsa’y atong dawaton sa Ginoo,” matud ni Bataclan.

Gilakbitan usab ni Bataclan ang mga kahilayan ug tentasyon hinungdan nga makalimot na sa Ginoo.

Matud ni Bataclan nga bisan unsa’y buhaton sa isig ka tawo mao usab ang gibuhat ngadto sa Ginoo. Gipahinumdum usab niya ang mensahe sa Santo Papa sa pag-anhi sa nasud nga mao ang “love and compassion, love and mercy” tungod kay kini gawi sa Ginoo ang pagkamahigugmaon.

Gawas niini gihisgutan sab ni Bataclan ang gender sa tawo nga angayan respetohan.

“God made man and women duna ta’y kaugalingong sexuality ato na’ng respetaan dili nato sagulon maglibog na ta….laki makigminyo og laki, babaye makigminyo og babaye,” matud ni Bataclan. Lakip sa gihisgutan sa homiliya mao ang respeto sa pamilya, kakugi ug pagkamanggihatagon sa grasya nga nadawat.

Gawas niini gipasumbingay usab ni Bataclan nga unta ang katawhan makamao kini’ng mopasaylo sa mga nakahimo ngadto kanila og kalapasan ug makamao’ng mopaubos. – /GMR) (BANAT NEWS)