Kawani sa DENR-7 gidunggab patay
CEBU, Philippines – Patay na nga nadiskubrehan sulod sa lawak sa panimalay nga iyang gipuy-an ang usa ka kawani sa Department of Environment and Natural Resouces (DENR-7) nga nakaangkon og samad dinunggaban sa iyang buko-buko.
Si PO3 Arvin Palonpon sa Presinto 3 sa Mandaue City Police Office (MCPO) miila sa biktima nga si Billy Pottu, 31-anyos, ulitawo ug casual nga kawani sa DENR-7 ug nagpuyo sa Almer’s Compound, barangay Tabok sa maong dakbayan.
Matud ni Palonpon nga alas 5 pasado na sa buntag kagahapon ilang nadawat ang taho labot sa patay’ng lawas sa usa ka tawo nga nadiskubrehan.
Nagtuo ang kapolisan nga namatay lang samtang natulog apan sa ilang paghiling sa lawas sa biktima ilang nadiskubrehan nga nakaangkon kini og samad dinunggaban.
Nasuta sa Scene of the Crime Operatives nga sayo pa sa gabii gipatay ang biktima.
Si Palonpon miingon nga wala’y nakamatikod nga mga silingan sa biktima dihang gihimo ang pagpatay apan adunay nakakita nga sayo pa sa gabii ang biktima nga adunay gikainom nga lalaki nga padayon pa karon nga giila sa follow-up operation nga ilang gihimo. – /GMR) (BANAT NEWS)
- Latest
