Duha ka paresang kaluha nag-polis

CEBU, Philippines - Kapin sa 300 ka mga bag-ong recruit sa kapolisan ang hingpit nga nanumpa kagahapon sa buntag lakip na niini ang duha ka paresan sa mga identical twins nga babaye ug lalaki.

Ang maong mga kaluha nga babaye naila nga sila si Kathy ug si Karin Salvacion nga taga dakbayan sa Mandaue.

Samtang ang lalaki nga kaluha naila nga sila si Roudgie Louell ug si Redgir Glecer Montejo, nga taga Apalan  sa lungsod sa Tuburan.

Sumala pa sa Public Information Officer sa Police Regional Office 7 Superintendent Renato Dugan nga kini ang unang higayon nga dunay duha ka paresan nga kaluha nga babaye ug kaluha nga lalaki nga pulos 22- anyos ang panuigon nga magdungan og training sa usa ka batch sa PRO-7.

Gibutyag ni Dugan nga sa 818 ka mga aplikante 511 lang kanila ang mipasar ug 54 niini ang mga babaye.

Si Kathy ug Karin Salvacion nga nahinabi sa mga tigbalita miingon nga pangandoy g’yud nila nga mamahimong polis ug sila pulos lisensyadong Criminologists.

Samtang ang kaluha nga Montejo miingon nga dili g’yud unta mosugot ang ilang inahan nga usa ka magtutudlo nga magpulis sila. Gani kurso nga Education ang gipakuha kanila ug pareho silang lisensyado nga maestro. (Bryner L. Diaz/EIM)(BANAT NEWS)