Babaye namaligya’g nubain, laing tulo nasikop
CEBU, Philippines – Nasikop sa mga sakop sa City Intelligence Branch ang tulo ka tawo lakip na sa usa ka babaye nga gikatahong namaligya og nubain sa sudlonong bahin sa Day-as, dakbayan sa Sugbo ala-una pasado niadtong Sabado. Unang nasikop si Sheila Peralta, 32, human siya masigpati sa mga sakop sa CIB nga namaligya og nubain ngadto sa usa ka lalaki kinsa mikaratil og dagan dihang nakabantay.
Nasundan sa kapolisan si Peralta nga misulod sa iyang kwarto diin ang usa ka metal container nga may sulod nga tulo ka ampoule sa nubain.
Sa wala pa masikop ang suspetsado, naaktohan sa kapolisan ang tulo ka tawo nga naghapnig og mga mini nga kwarta sulod sa maong kwarto hinungdan nga dali usab silang gisikop.
Ang nasikop mao sila si Ma. Sheilo Caballes, 30; Nichols Herrera, 54, nga taga Day-as ug si Philip Erasmo, 41, nga taga Pooc, dakbayan sa Talisay. Nakuha gikan sa lawak ang mga peke nga 15 kabuok tag P500, duha ka tag P1,000, walo ka tag P100 ug 15 tag P50.
Ang mga suspetsado natanggong na sa Cebu City Police Office.
Si Peralta mag-atubang og kasong kalapasan sa Comprehensive Dangerous Drugs Act of 2002 samtang ang tulo mag-atubang og kasong kalapasan sa Article 168 sa Revised Penal Code kon ang paghupot og mga peke nga salapi. - /GMR) (BANAT NEWS)
- Latest
