Demolisyon sa Citi Center gipahunong

CEBU, Philippines - Gipahunong sulod sa 20 ka adlaw sa konseho sa dakbayan sa Sugbo ang gipahigayong demolisyon sa Citi Center Complex sa Barangay Kamagayan tungod kay giingong wala kini mosubay sa ordinansa sa siyudad.

Ang hepe sa Prevention Restoration Order Beautification and Enhancement (PROBE) nga si Raquel Arce gikatakdang paesplikahon sa executive session karong Septiyembre 1, 2014 bahin niini. Lakip ang mga residente nga naapektohan sa maong demolisyon ang patungahon usab sa maong executive session.

Si Atty. Benjamin Militar, abogado sa 200 ka apektadong residente ang gipasulti kagahapon sa buntag sa konseho kabahin sa maong isyu.

Matud ni Militar nga ang gibasehan lang sa hepe sa PROBE sa pag-demolish niini mao ang Article 694 sa Civil Code, City Ordinance No. 1481 ug Section 28 sa Akta Republika 7279.

Apan giingong walay gipahigayong konsultasyon ug wa tahora ni Arce ang ordinansa sa siyudad. Si Konsehal Alvin Dizon nagkanayon nga kinahanglang putlon ang maong “practice” pag-bypass sa konseho.

Si Konsehal Sisinio Andales misugyot nga ipahunong una sulod sa 20 ka adlaw ang demolisyon aron mahatagan og kahigayonan si Arce sa pag-esplikar.

Ang kagamhanan sa Sugbo magpatukod og socialize housing alang sa mga kawani sa city hall diha sa maong lugar.  Si Mayor Michael Rama sa iyang bahin, nagkanayon nga buot niyang ma-demolish ang City Center Complex aron masugdan na dayon ang proyekto sa siyudad.  (BANAT NEWS)