80 porsiyento sa dinakpang kawatan taga Talisay

CEBU, Philippines - Kaso sa mga pagpangawat mosiaw matag mga buwan sa Mayo, Hunyo, Nobiyembre ug Disyembre matud sa hepe sa kapolisan sa dakbayan sa Talisay nga si Superintendent Reycel Carmelo Dayon.

Si Dayon mibutyag nga base sa ilang rekord  70 ngadto sa 80 porsiyento sa ilang mga nadakpang kawatan pulos Talisaynon ug 20 porsiyento lang ang naggikan sa nagkalain-laing lugar.

Matud usab ni Dayon nga bisan unsa nga paagi ang buhaton sa kapolisan dili gyud nila kini mapugngan.

Iyang gipasabot nga dili lang ang pagpanakop sa mga nakalapas sa balaod ang solusyon sa maong problema tungod kay kinahanglan nila ang tabang sa lokal nga kagamhanan pinaagi sa pagpauswag sa livelihood programs aron duna silay makat-onan nga panginabuhian.

Sa ulahing talaan sa kapolisan sa siyudad gikan sa buwan sa Enero hangtud sa Abril niining tuiga mikabat ngadto sa 78 ang insidente sa pagpangawat, 28 ang robbery ug 11 ang physical injury. Si Dayon nagkanayon nga kung tan-awon ang crime calendar sa kapolisan sa buwan sa Mayo ug Hunyo motaas ang krimen sa pagpangawat tungod kay tingpamalit kini og mga requirements sa tunghaan.

Dunay uban nga mangawat ngadto sa ubang tawo aron makapamalit og mga gamit sa eskwelahan nga gikinahanglan sa ilang mga anak.      

Apan dunay uban usab nga tumong lang gyud ang pagpangawat alang sa ilang bisyo ug sa maong mga buwan ang mga tawo nga moanha sa mga mall o mga tindahan magdala gyud kini og kwarta nga ipangompra.

Matud ni Dayon nga sa buwan sa Nobiyembre ug Disyembre motaas usab ang maong krimen tungod kay mangita ang mga kawatan og kwarta nga magamit nila sa pagsaulog sa Pasko ug Bag-ong Tuig ug labaw sa tanan abunda  og kwarta ang mga tawo.

Gawas niini daghang mga nanarbaho ngadto sa abroad ang mamauli sa maong mga buwan aron anhi sa nasud uban sa ilang mga pamilya magsaulog sa Pasko ug Bag-ong Tuig.  (BANAT NEWS)